புரையோடிப் போய்க்கிடக்கின்ற தமிழ் மக்களின் பிரச்சினைகள் அரசாங்கத்தோடு இராஜதந்திரமாக பேசி தீர்க்கப்படவேண்டும்

 (வெல்லாவெளி தினகரன் நிருபர்-க. விஜயரெத்தினம்)

புரையோடிப் போய்க்கிடக்கின்ற தமிழ் மக்களின் பிரச்சினைகள் அரசாங்கத்தோடு இராஜதந்திரமாக பேசி தீர்க்கப்படவேண்டும் என இராஜாங்க அமைச்சர் எஸ்.வியாழேந்திரன் தெரிவித்தார்.

எமது தமிழ் அரசியல் தலைவர்களைப் பொறுத்தளவிற்கு கடந்த ஏழு தாசாப்த காலமாக ஒரே விடயத்தைப்பற்றி பேசினார்களே தவிர தமிழ்மக்களுக்கு ஒன்றுமே பெற்றுக்கொடுக்கவில்லை.

நீண்டகாலமாக புரையோடிப் போய்க்கிடக்கின்ற தமிழ் மக்களின் பிரச்சினைகளையும்,தேவைகளையும்,குறைபாடுகளையும் அரசாங்கத்தோடு இராஜதந்திரமாக பேசி தீர்க்கப்படவேண்டும் என இராஜாங்க அமைச்சர் எஸ்.வியாழேந்திரன் தெரிவித்தார்.

மட்டக்களப்பு மாவட்டத்தின்  செங்கலடி-பதுளைவீதி பிராந்திய மக்களுக்கான  மக்கள் பணிமனை திறப்பு விழா இன்று ஞாயிற்றுக்கிழமை(18)மாலை 4.00 மணியளவில் இடம்பெற்றது.பின்தங்கிய கிராம அபிவிருத்தி, மனைசார்,கால்நடை மற்றும் சிறு பொருளாதார பயிர்ச்செய்கை இராஜாங்க அமைச்சர் சதாசிவம் வியாழேந்திரன் அவர்களின் செங்கலடி பதுளை வீதி பிராந்தியத்திற்கான மக்கள் பணிமனை அலுவலகம் கரடியனாறு பிரதேசத்தில் இன்று இராஜாங்க அமைச்சரினால் திறந்து வைக்கப்பட்டது.

செங்கலடி பதுளை வீதியின் முற்போக்கு தமிழர் அமைப்பின் பிரதான இணைப்பாளர் சுந்தரலிங்கம் சுந்தரகுமார் உள்ளிட்ட முற்போக்கு தமிழர் அமைப்பின் இணைப்பாளர்களின் தலைமையில் இந் நிகழ்வு ஏற்பாடு செய்யப்பட்டிருந்தது.இதன்போது இராஜாங்க அமைச்சருக்கு நினைவுச்சின்னங்களும் வழங்கி கௌரவிக்கப்பட்டார்.

இந் நிகழ்வில்  இராஜாங்க அமைச்சர் எஸ்.வியாழேந்திரன் உரையாற்றுகையில்...

எம்மைப் பொருத்தளவிற்கு கிழக்கு மாகாணத்தில் இரு வலிமையான அரசியல் கட்டமைப்பை நாங்கள் உருவாக்க வேண்டும்.இந்த கட்டமைப்பினூடாக எமது மக்களிற்கான ,எமது மக்களின்  தேவைகளை, அபிவிருத்திகளை நிச்சயமாக பெற்றுக்கொடுக்க வேண்டும். நீண்டகாலமாக புரையோடிப் போய்க்கிடக்கின்ற தமிழ் மக்களின் பிரச்சினைகளையும்,தேவைகளையும்,குறைபாடுகளையும் அரசாங்கத்தோடு இராஜதந்திரமாக பேசி தீர்க்கப்படவேண்டும்.

கடந்த காலத்திலே எமது தமிழ் தேசிய கூட்டமைப்பின் தலைவர்கள் ஐக்கிய தேசிய கட்சியை பாதுகாக்கின்ற விடயத்திலே கவனம் செலுத்தினார்களே தவிர,தமிழ் மக்களின் பிரச்சினைகளையோ அல்லது அம்மக்களின் பிரச்சினைக்கான தீர்வைப் பெற்றுக்கொடுக்க முடியவில்லை.

இந்த மாவட்டத்திலே எமது சகோதர,சமூகமான முஸ்லிம் சமூகம் அடைந்துள்ள வளர்ச்சியை நீங்கள் பார்க்க முடியும்.முஸ்லிம் அரசியல் தலைவர்கள் எந்த அரசாங்கம் வந்தாலும் அந்த அரசுடன் இணைந்துகொண்டு தங்கள் மக்களின் அபிவிருத்தி சார்ந்த அரசியலை தொடர்சிசயாக முன்னெடுத்து வந்ததால் அவர்கள் கடந்த காலத்தில் அபிவிருத்திக்காக போராடி இன்று இந்த மாவட்டத்தில் கிழக்கு மாகாணத்தில் எந்த உரிமையையும் இழக்காத சமூகமாகத்தான் காணப்படுகின்றனர்.

அன்மையிலே பாராளுமன்றத்திலே முஸ்லிம் மக்களின் உடலை எரிக்க கூடாது.அதை புதைக்க வேண்டும்.முஸ்லிம் பாராளுமன்ற உறுப்பினர்கள் அரசாங்கத்திற்கு ஆதரவை வழங்கினார்கள்.அரசுடன் பேசினார்கள்.எதிர்க்கட்சியில் இருந்துகொண்டு ஜனாதிபதி,பிரதமர், அரச சம்மந்தப்பட்ட அமைச்சர்களோடு பேசினார்கள்.வாக்களிப்பிலே சில முஸ்லிம் பாராளுமன்ற உறுப்பினர்கள் அரசுக்கு சார்பாக வாக்களித்தார்கள். அவர்கள் கேட்டது எங்கள் கொரோனாவால் தமது சமூகத்தில் இறந்தவர்களை புதைக்க வேண்டும்.எரிக்க கூடாது என்ற கொள்கையை முன்வைத்து ஆதரவை வழங்கி இன்று அவர்கள் அந்தவிடயத்தில் வெற்றி கண்டுள்ளனர்.ஆனால் எமது அரசியல் தலைவர்களைப் பொறுத்தளவிற்கு கடந்த ஏழு தாசாப்த காலமாக ஒரே விடயத்தைப்பற்றி பேசினார்களே தவிர தமிழ்மக்களுக்கு ஒன்றுமே பெற்றுக்கொடுக்கவில்லை.

கிழக்கு மாகாணத்தைப் பொறுத்தளவில் பல வகையிலும் மற்றைய சமூகத்துடன் ஒப்பிடும் போது நில,வள,பொருளாதாரம், கல்வி என பல வகைகளில் நாம் பின்னடைவை கண்ட சமூகமாக தமிழ் சமூகம் இருந்து கொண்டே இருக்கின்றதே தவிர இன்னும் முன்னேறுவதற்கான வழியயையோ அல்லது பாதையயையோ தமிழ் தலைமைகளால்  தமிழ்மக்களுக்கு காட்டவில்லை.

இன்று மலையகத்தில் ஆயிரம் ரூபா சம்பளம் கேட்டு எதிர்க்கட்சியிலே ஒரு பிரிவினர் சத்தம் போட்டு பேசினார்கள்.எதிர்கட்சியில் சிலர் அரசுக்கு ஆதரவு வழங்கினார்கள்.அரசாங்கத்தில் இருக்கின்ற மலையக அரசியல்வாதிகள் அரசுக்கு அழுத்தத்தை கொடுத்தார்கள். எதிர்கட்சியினரும் ஆளும்கட்சியிலும் இருந்து அரசுக்கு ஏதோ ஒருவகையில் அழுத்தத்தை கொடுத்து அரசுடன் பேசிய படியினால் இன்று அந்த ஆயிரம் ரூபா சம்பளத்திற்கான இணக்கப்பாடு கிடைக்கப்பெற்றுள்ளது. முஸ்லிம் மக்களின் உடலைப் புதைப்பதற்கான அனுமதி கிடைக்கப்பெற்றுள்ளது.

நான் பாராளுமன்றத்திலும் தெரிவித்தேன்.சம்மந்தன் ஐயா உட்பட அனைவரும் வாருங்கள் தமிழ் மக்களின் பிரச்சினை தொடர்பான அனைவரும் ஒன்றாகச் சென்று ஜனாதிபதி பிரதமருடன் சென்று பேசுவோம் என கூறினேன்.நாம் தயாராக இருக்கின்றோம் காரணம் எமது மக்களின் பிரச்சினை தொடர்பாகவும் அபிவிருத்தி சாரந்த விடயங்களையும் நாம் முன்னெடுக்க வேண்டும்.

இந்த பதுளை வீதியைப் பொறுத்தளவிற்கு இங்குள்ள மக்கள் பல பிரச்சினைகளை கடந்தகாலம் முதல் எதிர்நோக்கி வருகின்றனர். அரசியல்வாதிகள் அமைச்சர்கள்,பாராளுமன்ற உறுப்பினர்களை சந்திக்க வேண்டுமானால் இங்கிருந்து நகர் புறங்களுக்குதான் செல்ல வேண்டும்.

நாம் பதுளை வீதிக்கு மத்திமமாக இருக்கின்ற கரடியனாற்றிலே இன்று இந்த பிராந்திய அலுவலகத்தை திறந்துள்ளோம்.இதனூடாக இப் பகுதியில் உள்ள சுமார் 80ற்கு மேற்பட்ட கிராமங்களைச் சேர்ந்த மக்கள் உங்களின் தேவைகளை இங்கு வந்து தெரிவிக்க முடியும். இதனூடாக இப்பகுதி மக்களின் பிரச்சினைகளை தீர்க்க்கூடியதாக இருக்கும் எனத்தெரிவித்தார்.