மட்டக்களப்பு மாவட்டத்தில் தனிமைப்படுத்தப்பட்டுள்ள குடும்பங்களிற்கு பெறுமதிமிக்க உலர் உணவுப் பொருட்கள் வழங்கும் செயற்பாடு

(எஸ்.எஸ்.அமிர்தகழியான்) மட்டக்களப்பு

மட்டக்களப்பு மாவட்டத்திலும் கொவிட் 19 மூன்றாம் அலையின் தாக்கம் நாளுக்கு நாள் அதிகரித்த வண்ணமே காணப்படுகின்றது.

எது எவ்வாறு இருப்பினும் மட்டக்களப்பு மாவட்ட கொவிட் தடுப்பு செயலணி தேவைப்படும் அனைத்து சந்தர்ப்பங்களிலும் உடனுக்குடன் செயலணி கூட்டப்பட்டு காலத்தின் தேவைக்கு ஏற்றாற்போல் சிறந்த தீர்மானங்களை மேற்கொண்டு மக்களை இத்தொற்றிலிருந்து மீட்பதற்கான பல்வேறுபட்ட பணிகளை சுகாதாரத்துறையினர், முப்படையினர் மற்றும் ஏனைய திணைக்களகங்களுடன் இணைந்து இரவு பகலாக மேற்கொண்டுவருகின்றனர்.

அதற்கு அமைவாக தனிமைப்படுத்தப்பட்டுள்ள குடும்பங்கள் வறுமையால் எந்த வகையிலும் பாதிக்கப்படக் கூடாது என்பதற்காக மாவட்ட கொவிட் செயலணியின் தலைவரும் அரசாங்க அதிபருமாகிய கே.கருணாகரன் அவர்களது ஆலோசனை மற்றும் வழிகாட்டல்களுக்கு அமைவாக 14 பிரதேச செயலாளர் பிரிவுகளிலும் 10,000/= ரூபாய் பெறுமதியான உலர் உணவு  விநியோகத்தினை துரிதகதியில் மேற்கொண்டு வருகின்றனர்.

இவ் விநியோகமானது அவ்வப் பகுதி பிரதேச செயலாளர்களது ஆலோசனைக்கு அமைவாக கிராம உத்தியோகத்தர்கள், வெளிக்கள உத்தியோகத்தர்கள் தங்களது சேவையினை சிறப்பாக மேற்கொண்டுவருகின்றமையும் குறிப்பிடத்தக்கது.