(ரஞ்சன்)
மட்டக்களப்பு நெல்லிக்காடு கூழாவடி ஸ்ரீ சித்தி விநாயகர் ஆலயத்தில் 1008 சங்காபிஷேகப் பெருவிழா - பாற்குட பவனியுடன் பக்திபூர்வமாக நடைபெற்றது!
மட்டக்களப்பு மாவட்டம் போரதீவுப்பற்று 37ஆம் கிராமம், நெல்லிக்காடு பகுதியில் எழுந்தருளியிருக்கும் வரலாற்றுச் சிறப்புமிக்க கூழாவடி ஸ்ரீ சித்தி விநாயகர் ஆலயத்தின் வருடாந்த சங்காபிஷேகப் பெருவிழா இன்று (28.05.2026) வியாழக்கிழமை பக்திப் பெருக்குடன் வெகுவிமர்சையாக நடைபெற்றது.
ஆலயத்தின் கும்பாபிஷேக தினத்தை முன்னிட்டு ஆண்டுதோறும் நடத்தப்படும் இந்த விசேட சங்காபிஷேகப் பெருவிழாவில், இம்முறையும் மட்டக்களப்பு மாவட்டத்தின் பல பாகங்களிலிருந்தும் வருகை தந்த பெருந்திரளான அடியார்கள் கலந்துகொண்டு இறைவழிபாட்டில் ஈடுபட்டனர்.
இன்றைய விழாவின் முக்கிய அம்சமாகப் பாற்குடப் பவனி பக்திபூர்வமாக நடைபெற்றது.
நாகன்னி ஆலயத்திலிருந்து பக்தி கீதங்கள் மற்றும் மங்கள வாத்தியங்கள் முழங்கப் புறப்பட்ட இப் பாற்குட ஊர்வலம், வீதியெங்கும் அடியார்களின் "அரோகரா" கோஷங்களுடன் கூழாவடி ஸ்ரீ சித்தி விநாயகர் ஆலயத்தைச் சென்றடைந்தது.
இதில் நூற்றுக்கணக்கான பக்தர்கள் விரதமிருந்து பாற்குடங்களை ஏந்தி, தங்களின் நேர்த்திக்கடன்களைச் செலுத்தினர்
1008 சங்காபிஷேகக் கிரியைகள்
இவ் ஆலயத்தின் வருடாந்த சங்காபிஷேகக் கிரியைகள் யாவும் சு.கு.விநாயகமூர்த்திக் குருக்கள் தலைமையிலான சிவாச்சாரியார்கள் குழுவினால் சாஸ்திரோக்தமாக, மிகச் சிறப்பான முறையில் வழிநடத்தி வைக்கப்பட்டன.
நறுமணத் திரவியங்கள் மற்றும் பாலாபிஷேகத்தைத் தொடர்ந்து, முறைப்படி மந்திரங்கள் ஓதப்பட்டு, புனித நீர் நிரப்பப்பட்ட 1008 சங்குகளால் விநாயகப் பெருமானுக்கு மங்களகரமான முறையில் சங்காபிஷேகம் மிகச் சிறப்பாகச் செய்து வைக்கப்பட்டது.
சங்காபிஷேகத்தை அடுத்து நடைபெற்ற மகா தீபாராதனையைத் தொடர்ந்து அடியார்கள் அனைவருக்கும் விசேட பிரசாதங்கள் வழங்கப்பட்டன. இவ் ஆன்மீகப் பெருவிழாவானது இப்பகுதி மக்களிடையே பெரும் பக்திப் பரவசத்தையும், ஆன்மீக எழுச்சியையும் ஏற்படுத்தியிருந்தமை குறிப்பிடத்தக்கது.
Post A Comment:
0 comments so far,add yours